Canadami puisinniarnissaagaluaq taamaatiinnarneqassagunarpoq
Ukiut tamaasa marsip qaammataani Canadamiut puisinniartartut puisit 300.000-it missaat sikumi pisarisarpaat, ukiormannali puisinniarnissaagaluaq taamaatiinnarneqassagunarpoq.
Canadami aalisarnermut ministerip Gail Sheap oqaatigaa, sikup saappallaarnera pissutigalugu puisinniarfigineqarsinnaanngitsoq.
- Ukiuni 60-ini imaluunniit 70-ini aatsaat taamak siku saatsigaaq. Marsip naalernerani puisinniarneq aallartinneqartaraluarpoq, sikoqarpianngimmalli puisinniartoqarsinnaanera maannamut nalorninartorsiortitsivoq, Gail Shea CBC News-imit taama issuarneqarpoq.
Canadami aalisarnermut oqartussat puisinniartoqassanersoq aalajangiiffiginiarlugu puisinniartartut kattuffiat illoqarfimmi Îles-de-la-Madeleinemi ataatsimeeqatigissavaat.
- Puisinniartut isumanaatsumiinnissaat anguneqarsinnaanngippat puisinniartoqassanngilaq, Gail Shea erseqqissaavoq.