Canadami puisinniarnermi malittarisassat sukannernerulerput
Aamma puisit ameerneqartinnagit toqulluarneqarsimanissaat piniartunit qulakkeerneqartassaaq. CBC News nittartakkamini taama allaaserinnippoq.
Qaammatip ataasiinnaap matuma siornagut, aalisarnermut ministeri, Gail Shea oqarpoq, Canadap 2009-mi puisinniarnini pisarneq malillugu ingerlatiinnassagaa, aamma naak EU Canadamiut puisit amiutaannik eqqussinissamut inerteqquteqarniarluni pilersaaruteqaraluartoq.
Maannali allannguisoqarnialerpoq, malittarisassallu sukannernerusut atugaalissapput, aalisarnermullu ministerip malittarisassat sakkortunerusumik atuutinniarneqarnissaat neriorsuutigaa.
- Puisit qajassuussinerusumik toqunneqartarnissaat uumasut nakorsaannit ujartorneqarpoq, tamannalu malittarisassani nutaani qulakkeerneqartoq qularinngilluinnarpara, aalisarnermut ministerip oqaaseqartitaa, Phil Jenkins Canadami tv-qarfimmut taama oqarpoq.
Tamatuma illuatungaatigut uumasunik illersuiniaqatigiiffik, IFAW-p, Greenpeacemit sakkortusaarnerusartup, malittarisassat nutaat sakkukinnerarlugit uparuarpai.
Tassami malittarisassat nutaat najoqqutaralugit puisit imaaniittut piniartunit aallaaneqarsinnaapput, tamannalu puisit qularnaatsumik toqqunneqarnerattut oqaatigineqarsinnaanngitsoq, uumasunik illersuiniaqatigiiffik isumaqarpoq.