Canadami puisinniarneq imminut akilersinnaajunnaarpoq

Upernariartornerata taamaalinerani Canadami piniartut puisinniarlutik aallartittaraluarput, maannali puisinniartoqarnissaali piniartunit arlalinnit soqutigineqarunnaarsimavoq.
Allattoq Apollo Jeremiassen
apriilip 23-at 2011 15:10

Canadap sineriaani puisit 7 millionit missaanniissasut ilimagineqarpoq, tassa piniartut puisissaaleqinngikkaluarput.

Puisinniarusukkunnaarnermut pissutaaneruvoq puisip amiata akia. Ukiut arlalialunnguit matuma siorna ameq ataaseq 200 koruuneqaraluarpoq, ukullu tamaasa akikilliartorluni, tassalu maanna ameq ataaseq 100 koruuneqaannalersimavoq.

Tassalu tamannarpiaq pillugu piniartut ukioq manna puisinniarnissartik nangaanartoqartippaat.

Piniartut marluk, Ralph Tooktoshina, taanna Happy Valley-meersoq aamma Joey Angnatoq, taanna Nainimeersoq, Labradorip radioanut oqarput, puisinniarniaratik angallatip orsussaa benzina akisuallaalersimammat aammalu sillimmasiinermut aningaasartuutit amerlavallaalersimammata.

Piniartulli allat puisinniarusunnginnerminnut pissutaatippaat, uumasunik illersuiniaqatigiinnit akimmisaartinneqartarnertik, naak tamakku Canadap umiarsuarnik alapernaarsuutaasa ingalassimatinniartaraluaraat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq