Canadami puisinniarneq aallarteqqippoq
Pisassiissutit uumasunit illersuiniaqatigiinnit amerlavallaarsorineqarput, taamaattumillu sikumut avalanniarsaripput puisinniat ajoqusersorniarlugit, imaluunniit namminneq oqarnerattuut puiseeqqat sussuteqanngitsut annanniarlugit.
Ilaatigut ingasattajaarinninnertut isikkoqarsinnaasarpoq, piniartunulli pingaaruteqartorujussuuvoq. Taamaattumik Canadami sinerissami alapernaarsuisut peqataapput, ilaatigut puisinniarneq pissusissamisut ingerlanersoq alapernaarsorniarlugu ilaatigullu uumasunik illersuiniaqatigiit puisinniartunit ingalassimatinniarlugit. Tamakku pineranni puisinniat Newfoundlandimi Magdalenallu qeqertaanni puisinik piniarniarsaripput.
Canadami puisinniartarneq nunarsuatsinni annersaasarpoq ukiullu tamaasa nunami imaanilu akerliussutsiminnik takutitsiniartunik ornigarneqarluartarpoq.
Ukiuni kingullerni amerlasuuni Canadami puiseeqqat piniaqqusaanngillat…puiseerannguit qaqortut inequnartut iserujussuallit, europamiulli aviisiini amerlasuuni ukiut tamaasa suli takussaasarput. Assit qanganisaagaluarput, amerlanerilli tamanna maluginiarneq ajorpaat.
Brigitte Bardot qanittumi franskit tv-anni oqarpoq Canadamiut puisinniat piniarnerminni aassunnippallaamik pissuseqartut puiseerannguillu toqqorfissaqarneq ajortut. Vladimir Putin Ruslandimiit aamma ilannguppoq oqarlunilu taamatut piniartarneq aassunnippallaartoq. Uumasunik illersuiniaqatigiit ilaasa oqaatigaat pisassiissutit amerlavallaarujussuartut tassami silap allanngornerata kingunerisaanik puiserpassuit toqusussaammagit taamaalillunilu nunarsuarmi puisaalatsisoqalernissaa ilimagalugu.
Canadami naalakkersuisut puisinniartartut puisinniarnermillu inuussutissarsiorneq ernummatigaat, tamannalu tunngavigalugu maanna oqallisigineqalerpoq puisinniartarneq pillugu ileqqorissaarnissamut malittarisassanik pilersitsisoqartariaqartoq kiisalu puisinniartarnermut ilinniartitsisoqartariaqartoq. Tamatuma Europami nunat EU-lu paasitinneqassagaluarput tamaani piniarneq naakkittartumik ingerlanneqartoq tamannalu puiseqaannarnissaanut pisariaqarpoq.
