Canadami politiit pinngitsaalillutik atoqateqartarsimasutut pasineqartut
Manitoba Human Rights Commissionip nalunaarusiaani Canadami illoqarfimmi Winnipegimi politiinik unnerluussinerit ilaatigut taamatut oqaasertaqarput, aviisi Globe and Mail allappoq.
Oqaluttuartut kikkuunerinik isertuussillutik nalunaarusiami oqaluttuat annerusumik nunap inoqqaavineersut ilanngunneqarput, soorlu unnuaannakkut tigusarineqariarlutik illoqarfiup avataanut aallarunneqartarnitik taavanilu niuneqarlutik kamillaanngaq angerlamut pisuttariaqartarnitik, pinngitsaalisaalluni atoqatigineqartarnitik, peqqarniitsuliorfigineqartarnitillu oqaluttuaraat.
Politiit pisortaata, Doug Websterip Globe and Mailimut oqaaseqarnermini nalunaarusiami saqqummiunneqartut isumaalunnartoqartutut isigigaluarlugit, kinaassutsiminnik isertuussillutik oqaluttuarisimasaat paasiniaaffigereertinnagit uppernassusaat apeqquserallarpaa.
Inuit pisinnaatitaaffii pillugit ataatsimiititaliarsuarmi siulittaasup, Jerry Woodsip oqaatigaa politiit malersorneqalernissaat nalunaarusiap siunertarinngikkaa, aaqqiissutaasinnaasumilli oqaloqatigiissinnaalernissaq siunertaasoq.
