Canadami oqaatsit navianartorsiorput
- Oqaatsitta annaannissaat pingaaruteqariartuinnartoq, Canadami eqqillit høvdingiisa ukiumut ataatsimiinneranni, høvdingit qullersaat Perry Bellegarde oqarpoq.
Canadami nunap inuiisa oqaasii ullumi 60-it missaanniipput. Oqaatsilli ilai utoqqarnit arfilinnit arfineq marlunnilluunniit kisimi atorneqarput, utoqqaallu toqukkut qimagukkunik oqaasiisa atorneqarunnaartarput.
- Taamaattoqaqqusaanngilaq, Perry Bellegarde oqarpoq.
Pingasuinnaat aniguisissangatinneqarput
Oqaatsit illersorniarlugit iliortoqanngippat, oqaatsini 60-iusuni pingasuinnaat siunissami atorneqartarnissaat ilimagineqarpoq, tassaallutik eqqillit oqaasii atorneqarluartut, Cree aamma Mohawk.
Naggueqatitta oqaasii Inuktitut, qajannaattuuneri, atuarfinnilu ilinniagaasarneri pissutigalugit aniguisussatut ilimagineqartuni pingajuuvoq.
Oqaatsillu amerlanerit annanniarlugit, oqaatsit 60-it tamarmik Canadami pisortatigoortumik oqaasinngortinneqarnissai, nunallu inuiisa oqaasii pillugit pisortaqarfiliortoqarnissaa, Canadami eqqillit peqatigiiffiata, AFN-ip, Canadami naalakkersuisut piumaffiginiaraat, Perry Bellegarde aamma oqarpoq.
- Akisussasoq nalunngilarput, kisianni piorsarsimassusiitsinnut kinaassusiitsinnullu toqqammaviusut piffissap ingerlanerani navianartorsioriartuinnarput, Perry Bellegarde oqarpoq.