Canadami OL-eqataasussat puisit amiinit sanaanik uniformeqarnissaat kaammattuutigineqaraluarpoq

Isumassarsiaq Canadami naggueqatigiit Inuit Kattuffianni, Inuit Tapiriit Kanatami, siulittaasup, Mary Simonip, tapersersorpaa, nutaarsiassaqartitsiviup AFP-p allaaserisaa naapertorlugu, tikkuarlugu, inuit pinnguaataasa OL-ertoqarnerani takutinneqarnissaanni ujarak inussuk, taaguutilik Inukshuk, ilisarnaatitut Olympiske Komité-p qinersimagaa, taamaammat naggueqatigiit Inuit pisarneq malillugu puisinniartarnerisa attatiinnarneqarnissaat tapersersortariaqartoq.

Isumassarsiarli Canadami Olympiske Komité-p siulittaasuata, Chris Rudge-p, akerleraa, taassumalu ippassaq erseqqissaatigaa canadamiut puisit amiinit akulinnik sanaanik atisaqarnavianngitsut.

- Politikerit soqutigisaqaqatigiillu isumassarsiaat ataqqivarput, OL-imilli aaqqissuisut inunnut politikkikkullu tunngassuteqartunut qaquguluunniit akuliunnavianngillat, Chris Rudge nutaarsiassaqartitsivimmut AFP-mut oqarpoq.