Canadami nunat inoqqaavisa oqaasiinik ilinniartitsinialersut
Canadami nunap inoqqaavisa oqaasii assigiinngitsut maanna 53-iupput, amerlasuullu atorneruunnikuupput, tammavinnikuullutillu.
Inuktitulli oqaatsit inissisimalluarput, nukittupput ineriartortinneqarsinnaalluarlutillumi.
Inuktitut Nunavummi Nunavimmilu atuarfinni ulluinnarnilu pisortatigoortumik atorneqarput.
Nunatsiavummili Paggivittami ingerlalluanngillat, tassami tamaani naggueqatigiit Inuit taamaallaat 10 procentiisa missaat Inuktitut oqaluttuupput. Inuktitut oqaatsit tamaani nukittorsarneqarnissaat maanna suliniutigineqarnialerpoq.
Canadap Issittortaata kippasissortaani Inuvialunni pissutsit aamma taamaapput.
Oqaatsit eriagisassatut isigineqarput, nunallu inoqqaavisa oqaasiisa ilinniartitsissutigineqarnissaat pillugu Canadami naalakkersuisut 25 millionit koruuninik immikkoortitsiniarput. Inuktitut ilinniartitsineq kisimi pinnagu indianerit metisillu oqaasiisa aamma ilinniartitsissutigineqartalernissaat pilersaarutaavoq.
Nunalli inoqqaavisa oqaasii assigiinngitsut 53-iunerat eqqarsaatigalugu suliaq annertussaqaaq, oqaatsit tammavinnginnissaat pillugu suliaq imaannaanngitsuulluni.
