Canadami nunap inuiisa naalakkersuisut uteriiserfigivaat
Nunap inuiisa pisinnaatitaaffii pillugit nalunaarusiaq Naalagaaffiit Peqatigiinnit ukiut pingasut sinnerlugit matuma siorna Naalagaaffiit Peqatigiinnit akuersissutigineqarpoq.
Canada suliamut pingaaruteqartumut peqataavoq, nutaanilli naalakkersuisoqalermat nalunaarusiaq atsiorneqassanngitsoq naggataagut aalajangiunneqarpoq, soorlu USA aamma taamaaliorsimasoq.
Inatsisartulli apriilimi ataatsimiinnerat aallartimmat, nalunaarusiaq atsiorneqassasoq naalakkersuisut neriorsuutigaat, sulili tassa atsiorneqanngilaq.
Nalunaarusiap atsiorneqarnissaa nunap inuiisa naalakkersuisunut maanna uteriisissutigilerpaat.
Indianerit naalagaat, Edward John, tusagassiuutinut nalunaarummini allappoq, nunap inuiisa uumaannarnissaat ataqqinartumillu inuuneqarnissaat Naalagaaffiit Peqatigiit nalunaarusiaanni minnerpaamik piumasaqaataassasoq. Nalunaarusiap maannakkut atsiorneqarnissaa aamma pingaaruteqarnerarpaa.
- Canadami nunap inuiisa innuttaasullu allat saammaateqatigiinnissaat, qangali kissaatigineqartoq, piviusunngorniassammat, indianerit naalagaat taama oqarpoq.
Inuit Tapiriit Kanatami, siulittaasoq, Mary Simon, oqarpoq, Naalagaaffiit Peqatigiit nalunaarusiaat oqaluttuarisaanermut pingaaruteqassaqisoq, tassami nunap inuiisa pisinnaatitaaffiisa nunap inuiinit canadamiullu ataatsimoortumik paasineqarnissaat taamaalilluni sulissutigineqarsinnaanngussammat.
USA-mi nunap inuiisa pisinnaatitaaffii pillugit nalunaarusiap atsiorneqarnissaa pillugu USA-mi suliniaqatigiiffiit assigiinngitsut aamma isumaqatiginniassutigineqarput.
