Canadami nunap inuii 65 milliardit koruuninik piumasaqarput
Inuit eqqillillu Canadami atuarfinni nerisaqarfiutigisuni 1980-ikkut tikillugit naalliutsinneqarlutillu atornerlunneqartarsimasut Canadap ministeriuneranit inatsisartuinillu siorna taarsiivigineqarlutillu utoqqatserfigineqarput.
Atuartut atuarfinni nerisaqarfiutigisuniittut kisimik taarsiivigineqarput utoqqatserfigineqarlutillu, kisiannili eqqillit amerlaqisut, pingaartumillu inuit Nunatsiavuminngaanneersut, sumilluunniit pissarsigatik. Taakkua ”ulluunerani atuarfinnik” taagorneqartuni atuartuusimapput, tassa imaappoq unnuit tamaasa angerlartarlutik, atuarfiilli taakkua Canadap naalagaaffianit ilagiit kristumiut katuullillu peqatigalugit aamma aqunneqarlutik.
Inuit eqqillillu atuarfinni taakkunani atuarsimasut naalliutsinneqartarsimanertik pissutigalugu taarsiigineqartussaallutik isumaqarput. Soorlu namminneq oqaatsiminnik oqalukkaangamik annersinneqartarlutik qarngiluunniit qaqorsaammik sakkortuumik salinneqartarlutik. Taakkua atuarfinni nerisaqarfiutigisuni atuartutulli ilinniartitsisunit, mattuttunit arnanit palasinillu kinguaassiuutimikkut atornerlunneqartarsimapput. Soorlu eqqillit ilaat oqaluttuartoq, ”meeqqap atornerlunneqarnera taamaallaat minutsinik qulinik sivisussuseqartarpoq”.
Nunap immikkoortuani Manitobami eqqillit Canadap naalagaaffia eqqartuussisunut tunniunnialerpaat. Utoqqatserfigineqarusupput, kinguaassiuutitigut atornerlunneqartarsimanerminnut, tarnimikkut naalliutsinneqartarsimanerminnut kiisalu oqaatsiminnik kulturiminnillu annaasaqarsimanerminnut 65 milliardit koruuninik taarsiivigeqqullutik.
Inuit Nunatsiarmiut suliassiissummi tassani peqataanngillat, taakkuali arlaleriarlutik aamma taarsiivigineqarnissartik oqaatigisarsimallugu, Canadamilu inuit suleqatigiiffiat Inuit Tapiriit Kanatami taakkuninnga tapersersuilluinnarluni. Taamaalilluni inuit Nunatsiarmiut Canadap naalagaaffianik suliassanngortitsinissami ilanngunnissaminnut periarfissarissaarput.