Canadami naggueqatitta nannunniartarnertik ingerlatiinnassavaat
Canadami naggueqativut aamma isumaqarput nannut nungutaanissamut ulorianartorsiortinneqanngitsut Canadamilu nannunniarneq piujuaannartitsinissamik tunngaveqartumik ingerlanneqartoq.
Terry Audlap, Inuit Canadami tamakkerlugu suliniaqatigiiffianni siulittaasup ataatsimiinnermi oqaatigaa piujuaannatitsinissamik tunngaveqartumik piniarneq pillugu suleqatigiinnissaq pingaaruteqatupilussuusoq suleqatigiinnermilu tassani Inuit ilisimasaat Inuillu pisinnaatitaaffii ataqqineqartariaqartut.
Aammattaaq oqaatigaa nunat suliniaqatigiiffiillu allat Inuit ilaquttaminnik pilersuiniarlutik aningaasarsiorsinnaanissamik kissaataat ataqqisariaqaraat aammalu ileqquusumik piujuaannatsinissamillu tunngaveqartumik inooriaaseqarnissamut piumasseqarnerat ataqqisariaqaraat, Terry Audla taama oqarpoq.