Canadami naggueqatigiit inuit sikumi maluginiutinik ikkussuipput
Canadap avannarpasissortaani naggueqatigiit inuit ilisimatuunik peqateqarlutik sikumi maluginiutinik ikkussuipput. Silammi pissusiata allanngoriartorneranik peqquteqartumik siku piffissap ilaani saattuararsuusarmat tamannalu illoqarfimmiunut piniartunullu ingerlaviunissaa ulorianarsinnaasarpoq.
Issittumili inuiaqatigiit Nunaanngumiittut Mitsimatalimmiittullu sikumiittarnerat misiliutitut ikkussanit marlunnit qajannaarneqarnerulersinnaasoq, nutaarsiassaqartitsivik Vice.com allappoq.
Atortorissaarut Smartice-imik taaguuserneqarsimasoq, maluginiutaavoq, sikullu silissusaa uuttortarsinnaallugu. Assersuutigalugu maluginiut isumannaatsumik sikumut ikkunneqartarpoq, qamuteralannulli qimussinullu sikukkoortartunut aamma ikkunneqarsinnaalluni.
Taamaaliornikkut naggueqatigiit inuit Canadap avannarpasissortaani inuusut ukiorpassuarni piniarlutik assartuillutilluunniit sikukkoortarsimasut maanna sikup qanoq ulorianartiginera sikukkuunnginnerminni takoqqaarsinnaanngorpaat.
Maluginiullu pisariaqangaatsiarpoq, inuimmi 12-iugunik ataatsip sikukkut nakkarneq misiginikuusimasaraa, pingasuniillu marluk nakkarnissartik ernummatigisaraat, Nunatsivummi naalakkersuisut 2010-imi qaqugutigoortumik ukiukkut kiannerata kingorna misissuineranni takuneqarsinnaavoq.
Sumiiffinni allani sikup silap pissusiata allanngoriartorneranik sunnerteqqaffigisaani maluginiut Smartice atorneqalerumaartoq, Ilisimatuut kissaatigaat. Sikullu saappallaalerneranik kalerriisinnaasumik smartphonesinut app-imik sananissaq ilisimatuut aamma pilersaarutigaat.
