Canadami naalakkersuisut sakkortuumik avoqqaarineqarput

Nunap inoqqaavinut Naalagaaffiit Peqatigiit ippassaq ullorititaat atorluarlugu, Canadami naalakkersuisunut illuatungiliuttut siuttuata, Bill Grahamip, Canadami naalakkersuisut sakkortuumik avoqqaarai.

Canadami nunap inoqqaavisa atugarisaasa pitsanngorsaavigineqarnissaannik naalakkersuisut pilersaarutertik, Kelowna-mik taaguusersimasartik, piviusunngortissimanngimmassuk, Bill Graham avoqqaarinnippoq.

Pilersaarut naapertorlugu, nunap inoqqaavi pitsaanerusumik ilinniartinneqartalissapput, peqqinnerulernissaq anguniarlugu suliniuteqarfigineqalissapput, inissaannillu sanaartortoqassaaq.

Pilersaarut, Kelowna, Canadami inatsisartut amerlanerussuteqarluarlutik ukiarmi qinersisoqanngitsiartoq akuersissutigaat, piviusunngortinnissaanullu 25 milliard koruuninik immikkoortitsisoqarpoq. Canadamili naalakkersuisut qanganisarsiortuusut piviusunngortitsiniarlutik suliniuteqarsimanngillat.

- Canada taama pisuujutigaluni nunap inoqqaavisa atugarisaannik pitsanngorsaasariaqarpoq. Nunap inoqqaavi nunani ineriartortitassani innuttaasut atugarisaasa assinginik atugaqartinneqartariaqanngillat, nikanartutullu pineqartariaqaratik. Pilerisaarut Kelowna piviusunngortinneqartuuppat nunap inoqqaavi pitsuujunnaarlutik naammaginartumik inuuneqalersinnaagaluarput, naalakkersuisuusimasut siulittaasorisimasaat, Bill Graham, nunap inoqqaavi pillugit ippassaq taama oqarpoq.