Canadami naalakkersuisut Issittumi oqartussaanissaq soqutigisorujussuuaat
Amerikamiut Issittumi aalisaqqusiunnaarput, russit Canadap Issittumut killeqarfiinut qanilligaluttuinnarlutik timmisartortalerput, tamakkua Canadamiunut ernumanartorsiortitsipput... Taava aamma qeqertaarannguaqarpoq Tartupalummik taaguutilimmik, Aasuitsup Qeqertaata - tassa Ellesmere Islandip - Nunattalu Avannaata akornanniittumik, taannalu Danmarkip Canadallu tamarmik piginerartarpaat.
Canadamiut aamma Danmarkip nunanut allanut ministeeriaqarfiinit oqaatigineqarpoq isumaqatigiinniarnerit angusaqarfiujartuaartut, taamaattorli suliassaq naammassiuminaatsuusoq, aamma qaqugu aalajangiisoqarsinnaanera nalunarallartoq.
Canadamiut immikkut ilisimasallit arlallit isumaqarput, isumaqatigiinniarnerit naammassineqarnissaannut piffissanngortoq, tassami tamanna Canadap nunanut allanut isumaqatigiinniarnissaannut allanut aqqutissiuussisinnaassammat. Michael Byers, Bristisk Columbiami Universitetimi Issittumut immikkut ilisimasalittut ilisimaneqartup oqaatigaa, isumaqatigiinniarnerit taakku ajornannginnerpaamik naammassineqarsinnaagaluartut, tassami Canada aamma Danmark imminnut akeqqersimaartuunngimmata, taamalu oqaloqatigiinnikkut isumaqatigiinniarsinnaassuseqarlutik. Michael Byers-ip siunnersuutigaa, periaaseq atorneqarsinnaasoq tassaanerarlugu, qeqertaarannguup taassuma marlunngorlugu avinneqarnissaa, pisortatigullu isumagineqarnera suleqatigiissutigalugu, soorlu Frankrig aamma Spania qeqertaq Pheasant Island pillugu taamatut isumaqatigiissuteqartut.
Danmark aamma Canada taamatut isumaqatigiissuteqarsinnaasuuppata, tamanna nunanut allanut maligassiuisuussagaluarpoq, oqarluni nunat Issittut pillugit taamatut ataqatigiissaarisinnaaneq periarfissaasoq, Michael Byers naggasiivoq.
