Canadami naalakkersuisut ataatsimiititaliamik nutaamik pilersitsipput

Ataatsimiititaliap pilersinnissaa qangali oqaluuserineqalerpoq, soorlu Sydafrikami ammip qalipaataanik ukiorpassuarni immikkoortitsisoqareernerata kingorna, inuit saammaateqatigiinnissaat anguniarneqarsimasoq.

Canadami Inuit Eqqillillu, 1960-ikkunni ’70-ikkunnilu kostskolertut, kinguaassiutitigut tarnikkullu atornerlunneqartarsimanerannik tusartakkat ilumoornersut, Ataatsimiititaliap misissussavai. Kostskolit Canadami naalakkersuisunit imaluunniit katuullit tuluilluunnit ilagiivineersunit aqunneqartarsimapput.

Ataatsimiititaliap atuartuusimasut naalliutsinneqartarsimanerat tusarniaavigissavaa, taavalu saammaateqatigiinnissaq, isumakkeerfiginninnissaq paaseqatigiinnissarlu anguniassallugu. Ataatsimiititaliap ilaasortaasa kikkuuneri saqqummiunneqaqqammerput. Taakku tassaassapput Eqqillit pingasut, kisianni Inunnik ilaasortaqanngilaq, tassaluuna tamanna Inuit naammagittaalliutigigaat.

Peter Irniq, Nunavummi kommissæriusimasoq, Radioavisimut oqarpoq, Inummik ilaasortanngortoqannginnera isatsinnertut misinnartoq, soorlugooq Inuit naalliuutigisimasaat pisimanngitsut. Aamma oqarpoq ullumikkut ataatsimiittoqassasoq, Ataatsimiititaliamilu Inuit kisimik ilaasortaanissaat naalakkersuisunut sorsuutiginiaritsik. –Eqqillit sioraanni nassuiaassalluni ajornakusoorpallaassaqaaq, Inuit oqaluttuaat Inunnit aamma tusarneqartariaqarput, Peter Irniq naggasiivoq.

Ataatsimiititaliaq ukiuni tallimani misissuissaaq.