Canadami nunap immikkoortuani Quebecimi kiappallaarnera inuit inuunerannik kinguneqaqattaarpoq.
Canadap kangisissortaani kiarujuttajaarnera kingunerisaanik inuit ikinnerpaamik 17-it toqusut, peqqinnissaq pillugu oqartussat pingasunngornermi ilisimatitsissutigaat.
Quebecip illoqarfiisa pingaarnersaanni Montrealimi inuit aqqaneq-marluk toqusimanerat uppernarsarneqarpoq. Pingasunngornermi toqusimasutut nalunaarutigineqartut arfiniliupput.
Illoqarfiup aviisia, The Tribune naapertorlugu toqusunit tallimat Montrealip kangiani illoqarfinni toqupput.
- Quebecimi kiarujussuarnerata kingunerisaanik toqusut ilaqutaat eqqarsaatinniipput, premierministeri Justin Trudeau Twitterimi allappoq.
- Canadap qiterpasissuani kangisissortaanilu asseqanngitsumik kiaannarallarnissaa ilimagineqarpoq, taamaammat imminut ilaquttatillu qanoq illersornissaat qulakkeeruk, Justin Trudeau allappoq.
Quebecimi peqqinnissaq pillugu oqartussat oqaaseqartartuata, Mylene Drouinip utoqqaat sianissutsimigullu napparsimasut kianneranik toqquteqartuunerarpai.
Sumiiffinni assigiinngitsuni kiassuseq pingasunngornermi 34 gradiuvoq. Taanna kiassuseq silaannaap isugutanneranik akullugu 40 graditut misiginartoq, silasiortut paasissutissiissutigaat.
Quebecip kujasissortaani kiannera aalaakkaalluni tallimanngormalli 30 gradi sinnerpaa.
Nunap naalakkersuisuisa nunap immikkoortuani tamani kiappallaarnera pillugu aarlerisaaruteqarput. Kiannerali sapaatip akunnerata naajartornerani appassasoq naatsorsuutigineqarpoq.
Quebecimi kianneranit toqquteqartut 17-iisut nunap immikkoortuata tulliani Ontariomi kianneranit toqquteqartoqarsimanersoq suli uppernarsineqanngilaq.
/ritzau/AFP
