Canadami issangialernera akimmisaarfiulerpoq
Vancouverimi ukiuunerani OL-ertoqarnissaanut qaammat ataasiinnanngorpoq, Vancouverimilu massakkorpiaq qulinik kiattoq, aviisimi Politikenimi allaaserineqarpoq.
Sisoraatinik sangusaarfissami, qaqqami Whistler Mountainimi, arfinilinnik massakkut kiappoq.
Unamminissalli kiannera pissutigalugu navianartorsiunngitsut aaqqissuisut oqarput.
Siusinnerusukkut nittaalarujussuarmat illinerni aput meterit marluk sinnerlugit itissuseqarpoq.
Ooqattaasarluni sisorartartoq Nunatsinneersoq, Øystein Slettemark, ukiuunerani OL-eqarnissamut anngutereeraluarpoq, peqataassanersorli suli nalunarpoq. Øystein Slettemark OL-imut peqataassanersoq qaammatip uuma ingerlanerani paasinarsissaaq, apeqqutaammammi Nunat tamalaat Olympiadeqartarneq pillugu ataatsimiititaliaa aalajangissanersoq ooqattaasarluni sisorartartumik Danmark peqataatitaqassasoq.
