Canadami Inuit puammikkut kræfteqaleqqajaanerusarput

Naggueqatigiit Inuit Canadamiittut, Alaskamiittut Kalaallillu Nunaanniittut puammikkut kræfteqalersartut USA-mi innuttaasunut qaamasumik amilinnut naleqqiullugit marloriaammik amerlanerupput.

Nalunaarusiaq atuagassiami ”Journal of Circumpolar Health”-imi atuarneqarsinnaavoq, Québecimilu sapaatip-akunnerup massuma ingerlanerani saqqummiunneqarumaarluni.

Naggueqatigiit Inuit Canadamiittut puammikkut kræfteqalersarnerupput. Tamaani angutit kræfteqalersartut marloriaatingajammik amerlanerupput, arnallu kræfteqalersartut Issittup sinneranut naleqqiullugu pingasoriaatingajammik amerlanerullutik.

- Naggueqatigiit Inuit akornanni pujortarnerujussuaq tamatumunnga pissutaavoq, tamanna qularutissaanngilaq, Dr. Kue Young, Torontop universitetiani Issittoq pillugu immikkoortortaqarfimmeersoq, misissuinermillu aqutsisoq oqarpoq.

Canadami innuttaasut ataatsimut isigissagaanni 17 procentii pujortartarput, naggueqatigiillu Inuit akornanni 58 procentii pujortartartuullutik. Canadami naatsorsueqqissaartarfik taama allappoq.

- Inuit pujortarneq ajortut pujumik najuussuititaasut amerlanissaat aamma naatsorsuutigisariaqarparput, Dr. Young CBC Newsimut oqarpoq.

Mary Simonip, Inuit Tapiriit Kanatami præsidentip, kisitsisit aalassassimaarutigai, erseqqissaatigaluguli pujortartarnerup navianaateqarnera pillugu paasisitsiniaasoqangaatsiartoq.

Inuit angerlarsimaffimminni pujortartannginnertik takutinniarunikku qullermik tungujortumik qaamanilimmik ikkussisalernikuunerat assersuutitut taaneqarsinnaavoq, pujortartarnerlu pillugu Mary Simon paatsuugassaanngitsumik oqaaseqarpoq:

- Naggueqatigiit Inuit qanga pujortarneq ajorput, taamatullu inuuneqalernissarput uterfigeqqinniarparput, Mary Simon nittartakkamut Ud: ….Canada.com-imut oqarpoq.

Arnat naggueqatigiit Inuit akornanneersut illissamikkut kræfteqalersartut ikiliartortut misissuinerup takutippaa.