Canadami inuit ministeriunermit utoqqatserfigineqassapput

Canadami innuttaasut tamarmik kajumissaarneqarput,

ministeriuneq Stephen Harper inatsisartut ataatsimiittarfianni Ottawamiittumi ualeru utoqqatserpat, malinnaaqqullugit tusarnaaqqullugillu.

Inuit eqqillillu amerlasuut illoqarfinni arlalinni ippassarli katersuupput, amerlanerit illoqarfiit pingaarnersaanni Ottawami katersuullutik.

Eqqillit Inuillu meerartaat tuusintilikkaat atuarfinnut Canada-p kujasinnerusortaaniittunut pinngitsaalillugit atuariartortinneqarput, arlalippassuit kinguaassiutitigut atornerlunneqarlutik eqqarsartaaatsimikkullu akornuserneqarlutik.

Atuartut najugaqarfigisaanni amerlasuut toqupput, amerlaqisut tarnimikkut ikiligaallutik, tamakkulu kingunerisaannik imigassamik atornerluilerput, imminnut toqullutik inuunertillu sequmillugu.

Taakkua kinguaarpassui inatsisartut ataatsimiittarfiata silataanut ualeru katersuutissapput, ministeriunerup oqaasii tusarnaariarlugit.

Ministeriunerup Stephen Harper-ip Inuit Eqqillillu aqutsisui sapaatip akunnerani kingullermi ataatsimeeqatigai, utoqqatserneq qanoq oqaasertaqartariaqarnersoq tusarniarlugit.

Atuartut najugaqarfigisaannut aallartitaasarsimasut kisimik utoqqatserfigineqassanngillat, taakkua angajoqqaavi ilaqutaallu aamma utoqqatserfigineqassapput. Meeqqat aallartitaasarsimasut qanoq pineqarsimanersut ilaqutaasa ilisimanngilaat, ilaasalu meeqqatik takoqqinngisaannarsimallugit.

Inuit eqqillillu katersuuppata tarnip pissusaanik immikkut ilisimasallit allallu siunnersortit piareersimassapput, aallartitaasarsimanermi misigisat sakkortuut ilaannut qaffakaasinnaammata.

11. juuni-p Canadami inuiattut eqqilinnut inunnullu eqqaamaneqaatissatut ulloritinneqarnissaa siunnersuutigineqarpoq.