Canadami inuit aqagu utoqqatserfigineqassapput
Aqagu malunnartinniarlugu katersuunnissami naggueqatigiit Inuit sinnerlugit ilaatigut oqalugiassaaq Peter Irniq, siornatigut Nunavummi kommissæriusimasoq, taanna siulliit ilagalugit saqqummerpoq, naalliutsinneqartarsimanini atornerlunneqartarsimaninilu tamanut oqaluttuaralugit.
Peter Irniq Radioaviisimut oqaluttuarpoq, iluatsitsisimalluni, tassa aatsaat aqqanilinnik ukioqalereerluni 1961-imi ilaquttaminit peersitaasimagami... angutaa arnaaluunniit ilisimatinneqarsimanngillat imaluunniit susoqarnera paasisimanngilaat...aanneqarpoq aallarutipajuinnarneqarlunilu...aallarunneqarami pinngitsaalisaalluni tuluttuinnaq oqaloqqusaavoq, atuarfimmullu nerisaqarfiutigisumut Illuligaarsummiittumut, katuullinit Canadallu naalakkersuisuinit ingerlanneqartumut pisinneqarluni.
1950-ikkut aallartinneranni 60-ikkunnilu meeqqat 10.000-it missaat indianerneersuullutillu naggueqatigiinnit Inunneersut atuarfinni nerisaqarfiutigisuni tamakkunaniipput. Peter Irniq 16-inik ukioqalernissami tungaanut atuarfimmi nerisaqarfiutigisumiippoq.
Meeqqat allat naggueqatigiinnit Inunneersut arfinilinnik imaluunniit arfineq-marlunnik ukioqarlutik angerlarsimaffimminniit qimagutsinneqarput.
Peter Irniq oqaluttuarpoq mattuttut arnat qanoq qeerlerartaraanni aamma palasinit arlaleriarluni atoqatigineqartarluni... tassa aqqanilinnik aqqaneq-marlunnillu ukioqarluni pinngitsaalisaalluni atoqatigineqartarluni. Angerlarsernerujussuit, ilaquttaminut takornartatut misigisimalerneq, meeraanermik misigisaqanngitsoorneq, naalliuuteqarnerlu misigisimavai.
Taamatut oqaluttuassallit amerlaqaat, tassami meeqqat nerisaqarfiutigisuni atuarfinniittut amerlaqisut, tamarmiunngikkunik tamangajammik arlaatigut atortnerlunneqartarsimapput.
Canadami ministeriunerup Stephen Harperip aqagu Canadap Inatsisartuini Canadamiut tamaasa sinnerlugit naggueqatigiit Inuit Indianerillu atuagarliuutigisimasaat pillugit pisortatigoortumik utoqqatserfigissavai.
