Canadami illoqarfeeqqami puiserpassuit
Puisit ilaat oktobari naalersorli takkussuutilerput, sapaatip akunneratali siuliani 40-nit amerlanerusut illoqarfimmut illuarput.
Puisit Atlantikumut ungasinngitsumi, Paggivittap kangimut sineriaani, illoqarfeeqqami aqqusinerni maanna takussaapput.
Puisit maanna illoqarfimmi sumi tamaaniipput. Apummi qinngartakkami, biilit isaaffianni aqqusinernilu takussaallutik.
Puisit marluk biilinit aporneqareersimasut, Roddicktonimi borgmesterip CTV News-imut oqaatigaa. Taassumami puisit aqqusinerni apummi pulatersimasut biilertunit takuneqarpiarsinnaannginnerat ernumanartoqartippaa.
Puisit illoqarfimmi piniarneqarnissaat inerteqqutaammat innuttaasut qanoq iliornissanerlutik nalornissutigaat, taamaammallu oqartussat iliuuseqapallallutik qimagutitsinissaat neriuutigaat. Tassami sissamit imaanut 6-8 kilometerit tikillugit sikusimammat puisillu imaanut avalanneq ajuleqqapput.
Canadami aalisarnermut ministereqarfiup puisit qanoq nuutsinneqarsinnaanerat paasiniarpaa, taamaammat puiserpaalussuilli maannamut nammineertinneqarput.
Puisit ingerlariaqqinnaveeqqasut maannamut 40-t sinneqartut, CTV News tusagassiivoq.
Assilisat CBC Nunavummeersut ataani takuneqarsinnaapput:
