Canadami AWG-mut peqataasussat timmisartuunneqarnissaat Air Greenlandip aningaasaliissuuffigaa
Kalaallit Canadami Artic Winter Gamesimut unammeqataasussanut siumut utimullu timmisartuussinissat ilaatigut isumaqatigiissutigineqartoq, Air Greenland Kalaallit Nunaanni Timersoqatigiit Kattuffiallu tusagassiuutinut taama nalunaaruteqarput.
Timersoqatigiit Kattuffiat unammiartoqataasussallu 175-it Kangerlussuarmut Canadamilu Yellowknifemut utimullu timmisartuunneqarnerata akia ilanngaaserneqassammat, aningaasaliinissamik isumaqatigiissut ikinnerpaamik 1.000.000 koruuninik naleqarpoq.
Air Greenlandillu niuernermik pisortaata, Maliina Abelsenip isumaqatigiissut nuannaarutigaa.
- Nunatta timmisartortitseqatigiiffiatut pingaarnertut aningaasaliisooqqinnissarput, Timersoqatigiillu Kattuffiannik tassanilu timersortartunik suleqateqarnitta ingerlateqqinnissaa tulluusimaarutigaarput. Kalaallit Nunaata nittarsaannissaa nuannaarutigaarput, Maliina Abelsen tusagassiuutinut nalunaarummi taama oqarpoq.