Canadami aatsitassarsiornermut ilinniarnissaq taamaatiinnarpaat

Pilersaarut ilinniarnertuunngorniarfimmit tamanut neqeroorutigineqaraluarpoq, allaat ilinniareernermi suliffissaq qulakkeerneqarsinnaagaluarluni. Pisumili naggueqatigiit inuit pikkorissarnissaannut ussiataarneqarsinnaanngillat.

Aatsitassarsiornermik ilinniartitsinissatut pilersaarut aallarterianngitsorluunniit Nunavut Arctic Collegep taamaatiinnarpaa. Ilinnialernialernissamik inuit soqutigisaqannginnerat tamatumunnga pissutaavoq.

Alan Everard, ilinniartitsisussaagaluartoq, ukiuni 25-ni kuultisiornermik misilittagaqartoq, Nunatsiaq Onlinemut oqarpoq, suliffissat amerlaqisut aningaasarsiorfiortitsialaallu aamakorsuugaluartut.

- Suliffissat akissaatigissaarfiusut, sungiusalaaginnaraanni pissarsiarineqarsinnaasut amerlagaluaqaat, oqarpoq.

Ilinniartut aatsitassanik piiaanernut assigiinngitsunut, isumannaallisaanermut, misissuinermut aatsitassarsiorfinnillu matusinissanut aatsitassarsiornermik pikkorissarnermi ilisimasaqalissagaluarput.

Taavalu - akissarsiassatut - Mine Industry Acces-imi ilinniartunut suliffissat Agnico-Eagle's Meadowbank site-mi Baker Lake-p avannaaniittumi qulakkeerneqartussaagaluarluni.

Ilinniarneq sapaatip akunnerinik 32-nik sivisussuseqartoq naammassigaanni suliffissaq ajornarunnaassagaluarpoq.

Geoff Qilak Kusugak Kangerlinermi Kivalliq Inuit Associationimi aqutsisoq aatsitassarsiornermik pikkorissarnissamut nalunaartukippallaaneranut pakatsivoq.

- Inuit aatsitassarsiornermik ingerlatsilernissaannik ilumut ikiorusukkaluaqaavut, Kusugak Nunatsiaq Onlinemut oqarpoq.

Agnico-Eaglep Medowbankip aatsitassarsiorfiini sulisuisa 390-iusut ilaat 35 procentit missaat maannakkorpiaq naggueqatigiinnit inunneersuupput.