Canada USA-lu killilerngusaateqqajaapput
Canada aamma USA Ualerngup Tarajua, Canadap Alaskallu killeqarfiata eqqaaniittoq pillugu, piffissami sivitsulersumi isumaqatigiinniarput. Imartaq tamanna 21.000 kvadratkilometerinik annertussuseqarpoq, tassa Danmarkip annertussusaata affaa missigalugu. Imartaq tamaaniittoq aalisagaqartorujussuuvoq, naqqalu qularnanngitsumik uuliaqarlunilu gasseqassalluni.
Aaqqiagiinnginnerup oqaloqatigiinnikkut aaqqinneqarsinnaanissaa Canadamit aalajangiusimaneqaraluarpoq. Kisianni sapaatip akunnerisa marlussuit matuma siornagut imartap tamassuma tamakkerluni aalisarfigeqqusaajunnaarnissaa USA-mit aalajangiunneqarpoq.
Canada isumasioqqaanngilluinnarlugu, USA taamaaliorpoq. Tamanna sakkukiginarsinnaasumik Canadamit naammagittaalliuutigineqarpoq. Canadamili inatsisartuni illuatungiliuttut sakkortunerusumik naammagittaalliornissaq piumasaqaatigimmassuk, sapaatip akunnerani uani Canada sakkortunerusumik naammagittaalliuuteqarpoq. Nunanut allanut ministeeriaqarfimmit oqaaseqartitap oqaatigaa, Canadap akuersaarsinnaanngilluinnaraa, imartamut pineqartumut atatillugu Alaskami USA-milu naalakkersuisut, Canadap namminersortuunera tamaanilu pisinnaatitaaffeqarnera soqutiginngivillugit iliuusaat Canadap akuersaarsinnaanngikkai.