Canada upalungaarsimanissamik sungiusarpoq
Canadami aalisarnermut ministerip, Gail Sheap, nalunaarutigaa, uuliamik kuuttoortoqarnissaanut Qausuittumi sungiusarnerit naammasseqqammersut. Canadami sinerissami alapernaarsuisut, naggueqatitta akornanni hjemmeværnit canadamiullu suleqatigiillutik sungiusarneq ingerlappaat, Sullualukkut angallattoqarnerulermat umiarsuit uuliamik assartuutit uuliakuussagaluarpata qanoq iliornissartik ilinniarniassammassuk.
Aalisarnermut ministeri tusagassiuutinut allakkamini oqarpoq, suna tamaat piareersimaffigisariaqartoq.
- Kikkut tamarmik suleqatigiissinnaaniassammata sungiusartoqarpoq, Gail Shea oqarpoq.
Sungiusarneq sapaatip akunnera ataaseq ingerlanneqarpoq, ullormilu kingullermi sungiusarneq aalajangersimasoq, Talluritit, ingerlanneqarpoq, uuliakoortoqartuusaartillugu, sungiusartut atortut atorlugit uuliakoorneq unitsinniarsaraat, imaq sissarlu salillugit.
Sungiusarnermi uulia ilumoortoq atorneqanngilaq, uuliamut assingusoq, avatangiisinut ajoqusiinngitsoq, atorneqarluni.
