Canada-mi nunap inoqqaavi aningaasatigut ikilisaaffigineqarput
Canadami naalakkersuisut konservativiusut nunap inoqqaavisa peqatigiiffiinut assigiinngitsunut allakkanik nassitsiortorsimapput, nuna tamakkerlugu aningaasat missingersuutit 30 procentimik sipaarniarfigineqarniartut nalunaarfiginiarlugit, tamannalu ukioq-manna apriilip ulluisa aallaqqaataannit atuutilersinneqartoq.
Naggueqatigiit Inuit Peqatigiiffiat, Inuit Tapiriit Kanadami, naalakkersuisut tapiutigisartagaannit 11 millionit koruuninik ukiumut taamaalilluni annaasaqartalissaaq.
Inuit Tapiriit Kanadami præsidentiugallartoq, Duane Smith,tusagassirfinnut oqarpoq, naalakkersuisut Inuit Tapiriit Kandami sipaarniarfigissappassuk paasiuminaallunilu soqqusaatsuliornerusoq, pingaartumik massakkut Canada Issittumi Siunnersuisoqatigiinni siulittaasunngoqqammermat, issittumilllu salliutitsisussaalluni.
Peqatigiiffiit arlallit aamma naammagittaallioreerput, nunap inoqqaavinulli ministeri, Bernard Valcourt, oqarpoq, peqatigiiffiit allanit aningaasassarsiortariaqartut, naalakkersuisullu allanit pingaarutilinnit sipaarniuteqanngitsut, soorlu illuliortiternernit peqqinnissaqarfinnilluunniit.