Canada-mi inuit misilittaanermi atorneqartut eqqartuussivinni suliarineqarnianngillat

Naggueqatigiinnit Inuit Nunavummi Nunavimmilu najukkaminnit peersitaapput, "inuit-eksperiment"-imut peqataatitaallutik, ilaallu ilaquttaminnut utinngisaannarsimapput.

Eqqartuussisulersuussisut eqqartuussissuserisuat, Steven Cooper, oqarpoq, Canadami oqartussat suliamik unitsitsiniaasut.

- Oqartussat oqarfigaatigut piffissaq sivisuallaaq qaangiutereermat ajoraluartumik kingusinaartugut.

Suliaritinniagarput nutaanngippaallaarnerarlugu eqqartuussivimmulluunniit annguteqqunngilaat, oqarpoq.

Naggueqatigiit Inuit meerartaat arfineq-marluk 1900-kkut qeqqani "canadamiunngorsarlugit" illoqarfissuarmut Ottawamut nuutsitaapput, ilisarisimanngilluinnakkaminnik angajoqqaarsialigaallutik. Ilaasalu angajoqqaavitik kingorna attavigeqqinngisaannarpaat.

Taakku ilagaat Peter Ittinuar, aqqaneq-marlunnik ukioqarluni, nukappiaqqat allat marluk ilagalugit, Ottawamut nuutsitaasoq, taanna ima oqarpoq:

- Kinaassusiiagaanerma kingorna qamani ilunni eqqissisimannginnerujussuaq piulerpoq.

Alla, Leesee Qaqasaq, nunavummiu, arfineq-marluk missaannik ukioqarluni Nova Scotiamut aallartitaavoq.

Kingorna angerlaraluarami, paasivaa arnami oqaasii paasisinnaanagit, allaat oqaloqatigisinnaajunnaarsimallugu. Tamanna eqqarsartaatsimigut assut ikilerneqaatigisimavaa.

Meeraanerminni angerlarsimaffimmit peersitat Canadami oqartussat sumiginnaasimanerarlugit unnerluutiginninnerat eqqartuussissuserisup Steven Cooperip 2008-mi aallartippaa.

Eqqunngitsumik pineqarnertik pillugu taarsiiffigineqarusuttut suliassanngortitaat kinguneqanngitsuulerunarpoq. Eqqartuussivimmummi apuukkusunneqanngilaq.

Naggueqatigiit Inuit Canadamiut, pinngitsaalisaallutik 1950-ikkunni peersitaasut, Canadami naalakkersuisunit pisortatigoortumik siorna utoqqatserfigineqarput. Canadamili naalakkersuisut una pisoq pillugu oqaaseqarusunngitsut, CBC Newsimi allaaserineqarpoq.