Canada inuit najugaqarfii ajorput
Canadami aningaasarsiornikkut ajornartorsiorneq pissutigalugu naalakkersuit ikiuniaqatigiiffinnik assigiinngitsunik atuutsilersitsiniarput, ikiuniarnerillu ilaat naggueqatigiinnut inunnut atorneqartariaqarput, Mary Simon oqarpoq.
Canadap naalagaaffiata naatsorsueqqissaartarfiani kisitsisit kingulliit qaammat kingulleq saqqummiunneqartut malillugit naggueqatigiit inuit 31 procentii ineqarnermikkut atugaat ajorpoq, Canadallu sinnerani innuttaasut 3 procentii kisimik ineqarnermikkut atugaat ajortoq, tassalu naggueqatigiit inuit ineqarnermikkut atugaat quleriaammik ajornerullutik, tamanna akuerineqarsinnaanngilaq nuna Canada taamak pisuutigisoq, Mary Simon Canadami ilanngutassiortumut Marianne Stenbækimut taamatut oqarpoq. Canadami aningaasarsiornikkut ajornartorsiorneq pissutigalugu naalakkersuisut aningaasatigut ikiuiniarneranni naggueqatigiit inuit nutaanik initaartinneqarnissaannik ikiortariaqarpaat, Mary Simon oqarpoq.
Ineqarnikkut atuakkat ajortillugit allatigut sunniuttarput, soorlu peqqissutsimut ilinniagaqarniarnermilu ajornartorsiuteqarnikkut.
Canadami naggueqatigiit Inuit 44 procentii anigorneqarsinnaanngitsunik assigiinngitsunik nappaateqarput, tamatumanilu ineqarnikkut atukkat ajorneri tunngaviusumik pissutaasorineqarput.
Naggueqatigiit Inuit ilinniakkaminnik aallartitsisut affaata missaat ilinniakkaminnik naammassinnittarput, tamatumanilu ineqarnikkut atukkat ajornerat aamma patsisaatinneqarluni.
Canadap avannaani illoqarfinni nunaqarfinnilu najugaqarneq akisoorujussuuvoq, tamannalu pillugu naalakkersuisut ilisimatinneqartariaqarput, ingammik aningaasatigut ajornartorsiornerup maannakkut atuunnerani, Mary Simon Marianne Stenbækimit apersorneqarluni oqarpoq.