Canada, Frankrig aamma Issittumi Sakkutooqarfik Nuummi umiarsuarnut qaaqqusisut

Nuummi soqutiginnittunut Danmarkimit Canadamiillu sakkutuut umiarsuaannut sinerissamilu alapernaarsuutinut takornariartoqarsinnaanngorpoq.  

Nunat taakku marluk umiarsuarminnik septembarip aallaqqaataanni marlunngornermi nalunaaqutaq ualikkut pingasuniit arfernup tungaanut takornariartitsissapput. Tamanna Nuummi umiarsualivimmi Qeqertanut-ni pissaaq.  

Issittumi Sakkutooqarfik tusagassiuutinut nalunaarummi taama allappoq. 

Canadamiut sakkutuuisa umiarsuaat HMCS Robert Hampton Gray aamma franskit sakkutuuisa umiarsuaat Fulmar ataasinngornermiit pingasunngornermut tulanngassapput.  

Tikeraarneq sakkutuut amerlanerusut sungiusarnerannut ilaavoq, taanna nunatsinni aggustilli 27-anni ingerlanneqarpoq.   

Suliaqarneq Nanook 

Issittumi Sakkutooqarfik Canadamit Frankrigimillu sakkutuut peqatigalugit nunatsinni attaveqaasersuutit pingaarutillit illersornissaannut aalisarnermilu nakkutilliinermik ulluni kingullerni sungiusarput.  

Suliaqarnerup Nanook Tuugaallip sungiusarneranut tamanna ilaavoq.  

- Nunat tamalaat suleqatigineri Issittumi illersornissamut upalungaarsimanissamullu pingaaruteqarpoq. Isorartunera, silarluttarnera avatangiisillu sunnerneqariaannaanerat pissutigalugit nunat arlaannaalluunniit suliassaminnik kisermaassisinnaanngillat, Issittumi Sakkutooqarfik tusagassiuutinut nalunaarummi allappoq. 

- Taamaattumik suleqatigiit assigiimmik periuseqarput, attaveqatigiittarput piviusumillu suleqatigiillutik, taamaalillutik nunanit arlalinnit sulisussat atorfissaqartinneqalerpata ilanngutiinnarianngorlugit.

Canadamit Frankrigimillu umiarsuit saniatigut, Danskit alapernaarsuutaat Thetis-klassemiit peqataavoq. Ilanngullugu timmisartoq Dash-8 umiarsuarlu CCGS George R. Pearkes Canadap sinerissami nakkutilliisuinit. Taakkuuppullu umiarsuit marluk takornariarneqarsinnaasut. 

Sungiusarneq Canadami sungiusarnerunerup ilagaa, tassanilu Canadap imartaani sungiusarnerit ingerlanneqarlutik aamma USA tassani peqataavoq.