Cambodjami inuit 14.000-t toqunerannut akisussaasuusorineqartoq toqusoq

Cambodjamiut partiiata Kher Rougep paarnaarussiviani naalliutitsisarfianilu pisortaasimasoq, Kaing Guek Eav, 77-nik ukioqarluni toquvoq.

Eqqartuussiviup, Khmer Rougep Cambodjami kisermaassilluni naalakkersuisuunerani sorsunnermi pinerlunnerit pillugit suliaqartartup, immikkut oqaaseqartartua taama ilisimatitsivoq.

Kaing Guek Eav, Duchimik aterusilik, siornatigut matematikkertitsisuullunilu Phom Penhimilu parnaarussivimmi tusaamanerlugaaqisumi Toul Slengimi, S-21-mik taaneqartartumi, 1970-ikkut naaneranni pisortaavoq.

Duch parnaarussivimmi pisortaanini pillugu ukiuni 35-ni paarnaarussassanngortinneqarluni 2012-mi pineqaatissinneqarpoq. Inuit 14.000-nit ikinnerunngitsut toqunerannut akisussaasuusorineqarpoq.

Cambodja sukannersumik aqunnikuugaat

Kaing Guek Eav, Cambodjap illoqarfiisa pingaarnersaanni Phom Penhimi napparsimmavimmi pingasunngornermi ullaakkut toquvoq.

Khmer Rougekkut kommunistit parteerinikuusaat qoqassiillutillu saassussisarsimasut Pol Pot siuttoralugu Cambodja 1975-imiit 1979-imut sukannersumik aquppaat.

Khmer Rougekkut qullersarisimasaat Pol Pot 1998-mi toqusoq pinerluttuliani pillugit akisussaatinneqarsimanngisaannarpoq.

Nunarsuarmi inuiannik toqaraanerit oqaluttuarisaanermi annersaasa ilaat Cambodjami partiip Khmer Rougep siuttuuneranni pivoq.