Californiami ilaatigut hashi taasissutigissavaat
Californiami aamma inatsisissatut siunnersuutit oqallisaaqisut ullormi qinersivissami nassaasaapput, ilaatigut ikiaroornartup haship namminermut atugassap inerteqqutaajunnaarnissaanut tunngasoq.
Ullumikkut ikiaroornartumik pujortartoqarsinnaavoq nakorsap innersuussinera malillugu. Ullumikkut taassissutigineqartoq tassaavoq marihuanamik tunisassiortoqarsinnaanersoq tuniniagassamik. Demokratit siunnersuut tapersersorpaat, ilaatigut tunngavilersuutigalugu Californiap aningaasarsiornikkut ingerlanera annaanneqarsinnaasoq ikiaroornartup akileraarusersorneratigut. Suli nalunarallarpoq siunnersuut akuersaarneqassanersoq, maannakkorpiaq angertut naaggaartullu amerlaqatigiippasipput, kisianni siunnersuutip itigartinneqarnissaa ilimanarpoq.
Californiami aamma qinersisartut isummerfigisussaavaat naalagaaffiup CO2-mi aniatitsinerminik nalimmassaanissaa.
2006-mi Californiami silap pissusaanut inatsit sukanganerpaaq aalajangiunneqarpoq, oqartoqarluni 2020-mi Co2-mik aniatitsineq 1990-misulli annertutigissasoq.
Ullumikkullu akerliusumik siunnersuuteqartoqarpoq, taannalu republikanerineersuuvoq, inuussutissarsiortunit aamma uuliasiortunit.
Siunnersuutip ullumikkut inatsit atuutereersoq atorunnaarsinnavianngilaa, kisianni tassani inatsimmut siunnersuummi piumasaqaataavoq suliffissaaleqinerup 5,5 %-i qaangissanngikkaa, taamaattoqarsimavorlu kingullermik 1980-ikkunni, tassa pivusumik isigalugu inatsimmik atuuttumik atorunnaarsitsisussaavoq.
Naalagaaffimmi aamma pilerngunneqartut ilagaat Arnold Schwarzeneggerip kingorna guvernøritut atorfik aningaasarpassuarnik atuinikkut qineqqusaarfiusoq.
Tassani pilernguttut tassaapput arnat inuussutissarsiortut marluk nukittuut. Siulleq e-bay-imik aallartitsisup, Meg Whitman-ip, qallunaat aningaasanngorlugit atorsimavai 750 mio. kr.-nit, qinigaanissaalu ilimanaateqarani.
Aappaa Carlie Fiorena, aningaasanik ikinnernik atuisimagaluarluni, kisianni aamma taassuma qinigaanissaa ilimanaateqanngilaq, taamaattumik Californiami qinigaaniaraluarluni aningaasaliinnerit atuilussinnarnertut taasariaqarput.
