Californiap corona siammatsaaliorlugu parnaarussat 8000-it iperarniarai

Californiap parnaarussivimmini coronavirusip siaruaannera unitsikkumallugu parnaarussat 8000-it tungaanoortut iperarniarpai.

00:00:10

Californiami, coronamik nappaalanersuarmik USA-mi naalagaaffinni eqqugaanerpaasumi, oqartussat taama nalunaartut, nutaarsiaqartitsivik Reuters allappoq.

Californiami parnaarussivinni arlalinni coronavirus tuniluuttoq qaammatini kingullerni misigaat.

Taamaammat parnaarussat 8000-it tungaanoortut parnaarussaanertik suli naammassinngikkaat iperagaasinnaanerat periarfissaalersinniarpaat.

Parnaarussivinni ilungersunartorsiorunnaamiumallutik taama misiliipput.

Oqartussat taamaaliornermikkut imminnut ningorsimaarnissamut mattusimanissamullu maleruagassat parnaarussanit malinneqarsinnaanerat ajornannginnerulersikkusuppaat.

- Parnaarussat sulisullu peqqissuunissaat pillugu taama iliorpugut,

Ralph Diaz, Californiami pinerluuteqarsimasunut isumaginniffiup oqaaseqartartua oqarpoq.

Parnaarussat siulliit aggustip naanerani iperagaassapput.

Parnaarussat, pillagaanerminni sivisunerpaamik ukiumik tataatsimik amigaateqartut siullertut iperagaanissamik qinnuteqarsinnaapput.

Parnaarussalli persuttaanermik kinguaassiornermullu tunngasunik pinerlunnermik eqqartuussaasimasut piffissaq sioqqullugu iperagaanissamik qinnuteqarsinnaanngillat.

California coronamik eqqugaaqaaq. Tamaani coronamik toqquteqartut maannamuugallartoq 7000-iupput.

Parnaarussivinni 35-ini parnaarussaasut 2400 tunillanneqarsimasut, Californiap guvernøria Gavin Newsom sisamanngormat oqarpoq. San Francisco-p avaannaani parnaarussivimmi San Quentin-imiinnaq 1300-it tunillanneqarsimapput.