Cairnip qullersaqarfia Greenpeacemit akornusersorneqarpoq
Cairn Energy kisiartaalluni misileraalluni Issittumi ukioq-manna qilleriniarpoq, Issittumilu pinngortitap mianernaqisup mianersuunneqarnissaa Greenpeace-imeersut piumasaraat.
Greenpeacep umiarsuaata, Esperanzap, Cairn Energyp Kalaallit Nunaanni qilleriviata qanittuani alaatsinaannerata nalaani Greenpeacemeersut "nanorsuaq" Edinburghimi qullersaqarfiup isaariaanut tassa assiuppaat. Esperanza maanna Nuup avataaniippoq, Cairn Energyllu umiarsuaa qillerut, Leiv Eiriksson, taquassanik inuttassanillu nutaanik pissarsiorpoq. Cairn Energy Nuup Qeqertarsuullu avataani sumiiffinni sisamani qillerissaaq, avannarpasissutsimi 71 gradimi, taavalu 1.500 meterisut ititigisumi.
Issittumi qillerinissaq Tuluit Nunaanni naalakkersuisut ippassaanikkunni mianersoqqussutigaat. USA Canadalu qillereqqeqqusinngillat, immamilu sikorasaartumi qillerinissaq Norgemit itigartitsissutigineqarpoq.
- Issittumi uuliasiornissat navianartortaqartoujussuupput, Tuluit Nunaannilu naalakkersuisut atorfilittaasa allakkiaat naapertorlugu, teknikkikkut aamma pisussanik piareersaanikkut, tassa logistikkikkut, upalungaarsimanissap killinnguaniippoq. Tamanna akuerineqarsinnaanngilaq, oqariartuullu tamanna Cairn Energyp qullersaqarfianit tusaanngitsuusaaginnarneqarsinnaanngilaq, Jon Burgwald, sila pillugu Greenpeace-mi sulisuusoq oqarpoq.