Cairnip Greenpeacellu aaqqiagiinnginnerat suli naammassinngilaq
Nunap immikkoortuani eqqartuussiviup Amsterdamimiittup aalajangiinissaa aqagumuugallartoq kinguartinneqarpoq. Suliaq Amsterdamimi ingerlanneqarpoq, Greenpeacep umiarsuai Esperanza Arctic Sunriselu Hollandimi nalunaarsorneqarsimammata.
Skotlandimiut uuliasioqatigiiffiata Cairn Energyp pinngortitamik illersuiniaqatigiit Greenpeace eqqartuussivimmut suliassanngortippai, uuliasiorfimmut siunissami qalloqqinnissaat pitsaaliorumallugu. Uuliasioqatigiiffiup piumasaraa, Greenpeacep qillerinerminni akornusersoqqippatik, ullormut 15 millioni koruuninik akiliisinneqartassasoq. Cairn Energy tusagassiorfinnut nunani tamalaaneersunut arlalinnut oqarpoq, qillerinerminni pinngortitamik illersuinianit akornusersorneqaraangamik ullormut "minnerpaamik 30 millioni koruuninik" imminnut akeqartartoq.
Akerliussutimik takutitsilluni iliuuseqarsinnaanissamut piginneqatigiiffimmit nunani tamalaali ingerlataqartumit unitsinniarneqarneq Greenpeacep nunani tamalaani kattuffiata misilittagaqarfigereerpaa, nunanili avannarlerni immikkoortortaa aatsaat misigaa.
Norgemiut tuluillu pisortai nutaarsiassaqartitsivimmut Reutersimut oqaluttuarput, upalungaarsimanermut pilersaarutit saqqummiunnissaat kisaatigineqarangaata tamanut saqqummiuttaritik.
Upalungarsimanermut pilersaarutit Greenpeacep pissarsiarissagaluarunigit, kikkunnulluunniit attuumassuteqanngitsutut namminneq taasaminnut tunniunniarpaat taakkua nalilerniassammassuk, pilersaarut attanneqarsinnaanersoq aammalu mingutsitsisoqassagaluarpat avatangiisit illersornissaannut naleqquttuunersoq. Aasaq manna qillerivissat itissusaaat
Greenpeacep ilaatigut isornartorsiugarai.
