Cairnip ajugaanissaa Greenpeacemit ilimagineqareerpoq
Tusarniaanerulli ingerlanerani tupaallannartumik pisoqarpoq. Greenpeacep illersuisuisa oqarnerattut, uuliamik maagaannaq maqisoortoqassagaluarpat Cairnikkut pilersaarutaannut eqqartuussisoq eqqasuuteqarluni oqarmat.
- Pissanganarluinnartumik pisoqarpoq. Tassami eqqartuussisuuneq Cairn Energyp illersuisuinut saaffiginnippoq aperalugillu, sillimaniarnermut pilersaarutit kikkunnit tamanit takuneqarsinnaasariaqaraluannginnersut aamma inuiqatigiinnit taakku ilisimasariaqaraluannginnersut aamma sooq Cairn Energymit isertuunneqarnersut. Taakkulu sivikitsumik oqaloqatigiilaariarlutik akipput, Namminersorlutik Oqartussat namminneerlutik taakku isertuukkusussimagaat, Greenpeacep Hollandimi eqqartuussinermi illersuisua, Jasper Teulings oqarpoq.
Sillimaniarnermut pilersaarutit takorusullugit Greenpeacekkormiut maanna arlaleriarlutik Cairn Energyp qillerutaanut qaqillutik piumasaqartaraluarput, tamatigulli iluatsitsissanatik.
Greenpeacep illersuisuata oqarnera naapertorlugu, eqqartuussivimmi tusarniaaneq Cairn Energymit ajugaaffigineqassagatinneqarpoq.
- Eqqartuussineq aqagu naammassippat ilimanarluinnarpoq qillerisunut aalajangersimasunut Greenpeacep eqqissisimasumik takutitsisarneri unitseqquneqartussaassasut. Unali allanngortinneqarsinnaanngilaq, uuliasiortunut akerliunitsinni suliniutigut unitsinneqassanngimmata, Jasper Teulings oqarpoq.
Cairn Energyp illersuisuinut eqqartuussisup saaffiginninnera Greenpeacemit ajugaanertut isigineqarpoq. Greenpeacep illersuisuata oqarnera naapertorlugu, tassami qillerinermi ajutoortoqassagaluarpat Cairn Energyp tamassumunnga qanoq akiliisinnaanera eqqartuussisumit upperineqarpallaanngimmat. Cairn Energyp illersuisui arsaq Namminersorlutik Oqartussanut ingerlateqqittuusivaat.
Sooruna sillimaniarnermut pilersaarutit isertuunneqartut?
- Cairn Energy annertuumik qitiulluinnartumillu sillimaniarneq eqqarsaatigalugu akisussaaqataavoq, ajutoortoqassagaluarpallu ikiuuttussaatitaalluni, aatsitassanut naalakkersuisoq Ove Kar Berthelsen akivoq.
Sillimaniarneq eqqarsaatigalugu suut isertuunneqarnersut pillugit Ove Karl Berthelsen aperineqarami akivoq annertunerusumik oqarsuaatit normui isertuunneqartut.
- Aappi, annertunerusumik taamaappoq, tassami sillimaniarnermut pilersaarutip annertunerpaartaa tamanut saqqummiunneqareernikuuvoq, Ove Karl Bertehlsen akivoq.
Hollandimi eqqartuussivimmi tusarniaaneq aqagu naammassisussaavoq, ilimagineqarporlu Greenpeace ajorsassasoq, tassalu tamanna isumaqarpoq, taakku aasap ingerlanerani Cairn Energyp qillerinerisa nalaani ajoqusersuissagaluarpata ullormut 2 millionit euronik akiliisinneqartalissasut.