Cairn uuliamik nassaanngilaq

Uuliasiortitseqatigiiffiup Cairnip Kalaallit Nunatsinni ukiormanna misileraalluni qillerinini maanna taamaatippaa. Atammiup avataani uuliasiorluni qilleriviit marluk maanna milinneqarlutillu qimanneqareerput, skotlandimiullu suallagatik angerlamut aallareerput.
Allattoq Carla Davidsen
novembarip 30-at 2011 06:40

Nuup kitaatungaani 200 kilometerinik avasitsigisumi qillerivimmi, AT7-imik taaguuteqartumi, sioqqat qaleriiaat, uuliamik gassimilluunniit akoqarsinnaasut, qaammatip uuma aallartilaarnerani naammattooraluarpaat, isumallualeraluarpullu.

Ajutoorpulli. Mississuineq, atortorissaarut akisoorsuaq atorlugu misissuineq, MDT-mik taaguutilik, aallartikkaluarpaat, kulbrinteqarnissaanilli neriunnerigaluat taamungaannarpoq. Laboratoria-mili misissugassanik Tuluit Nunaannut nassitsipput.

Qilleriviup aappaani, Nuummiit 180 kilometerinik avasitsigisumi kulbrintimik annertunerusumik aamma nassaanngillat.

Uuliasiortitseqatigiiffilli aappaagumut pilersaarutit pillugit suli aalajangiussaqanngilaq. Baffinip Kangerliumarngani taamanikkussami misileraassapput, tamaani sajuppillatsitsilluni maanna misissuisoqarpoq, uuliamik gassimillu annikitsunnguamik maannamut nassaartoqareerluni. Misissueqqissaarnerit 2012-imi naammassinissaat Cairnip naatsorsuutigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq