Cairn suli qillereqqinniarpoq
Nuummiit 300 kilometerinik kippasinnerusumi, Lady Franklin-p puilasuanik taaneqartartumi, skotlandimiut uuliasiortitseqatigiiffiat qillerinermini nassaanngilaq, puilasorlu maanna milinneqarpoq qimanneqarlunilu. Soorlu aamma Nuummiit 200 kilometerinik ungasitsigisumi Atammimmi qillerinerit unitsinneqarallarsimasut.
Tassunga taarsiullugu umiarsuit qillerissutit marluk Cairn Energy-mit attartorneqarsimasut, Leiv Eiriksson aamma Ocean Rig, avannamut qilleriffinnut allanut marlunnut nuutsinneqarput, Qeqertarsuup kitaanut qillerivik Napariamik taaneqartumut ilaatigullu Eqqua-nik taaneqartumut.
Kisianni tamanna naammaginagu Cairn Energy tallimassaanik qillerivimmik aasaanerani ammaanialersoq, suliffeqarfiup ukiup affaanut naatsorsuutaasa saqqummiunneqarneranni oqaatigineqarpoq.
Tassani oqaatigineqarpoq, issuaaneq aallartippoq: "akuersissutit pisariaqartinneqartut tunniunneqarpata, piffissarlu ajunngippat, Atammimmi qillerivimmik nutaamik ammaanissarput eqqarsaatigaarput", issuaaneq naavoq.
Naak aasaanerani qillerinerit uuliaqarneranik maannakumut suli nassaarfiunngikkaluartut, taamaattoq Kalaallit Nunaanni suliniutit suli ilimanaateqarput.
Cairn Energy-p ukiup affaanut naatsorsuutit oqaasertaanni aamma eqqaavaat, Kalaallit Nunaanni uuliasiornermut atatillugu siusissumik nukittuumik siuttutullu inissisimasumik ineriartortitaqarsimallutik, uuliasiorfissallu aqqaniliusut sumiiffimmi 102.000 kvadratmkilometerisut annertutigisumi suli isumalluarnartorujussuusut unnerlugit.
- Kalaallit Nunaata Kitaata misissoqqissaarneqarnerata nanginneranik periarfissat Cairn-imiit qiimmaallannartutut isigineqarput. Qillerinissanit quliusunit sisamariarluni qillerereernermi sumiiffik pillugu paasissutissanik pitsassuarnik pissarsisimavugut, nalunaarusiami allattoqarpoq.
Aasaq manna qillerinerit suliffeqarfimmut taakku namminneq nalunaaruteqarnerat naapertorlugu 3,1 miliardit koruuninik naleqarput. Lady Franklin-imilu qillerigaluarneq kinguneqanngitsoq maannakkumut milliardit affaanik naleqarsimavoq, suliffeqarfimmiilli naatsorsuutigineqarpoq tassunga aningaasartuutit 772 millionit koruunit sinnerlugit amerlassuseqarumaartut.
