Cairn: Pilersaarutit A, B aamma C tassaapput Kalaallit Nunaat
- Nunarsuatsinni sumi allani nutaanik pilersaaruteqarnerluta oqarsinnaanngilanga, kisianni pilersaarutit tulleriit A, B aamma C Kalaallit Nunaannut tunngapput, Tuluit aviisiannut The Daily Telegraphimut Cairn Energyp pilersitsisua, Sir Bill Gammell oqarpoq.
Skotlandimiut uuliasioqatigiiffeeraata pilersitsisua ilisaritillugu takingaatsiartumik aviisimi ullumi saqqummersumi allaaserineqarpoq.
Ilisaritinneranut pissutaavoq suliffeqarfiup pigisaata ilaannit, Cairn India-p aktiaataanik tuniniaalerneq pimmat. Tuniniaaneq 50 milliard koruunit angullugit naleqartoq, aviisip Berlingske Tidende-p allaaseraa.
Qeqertarsuup avataani qillerinermi uuliamik nassaartoqassagaluarpat qallorneqalissagaluarpallu, pappiaqqat aningaasanik nalillit aningaasanngortinneqarneranni, Cairn Energyp Kalaallit Nunaanni sulinini annertusassagaluarpaa. Cairn Energymi aningaasarsiornermut aammalu inatsisinut tunngasunut pisortaa, Simon Thomson taama oqarpoq:
- Tunisinermi aningaasat isertinneqartut amerlanerpaartaat iluanaarutitut piginneqataasunut tunniunneqassapput. Aningaasallu sinneruttut ujarlernermi teknikkikkullu nalileereernermi siuariartortsitsinitsinnut atorneqassapput, soorlu maani Kalallit Nunaanni taama iliortugut, Simon Thomson oqarpoq.
Cairn Energy uuliasiorfiit minnerpaartaanniit maanna nunarsuatsinni uuliasiorfiit annerpaat akornanniilersoq, Tuluit aviisiata The Daily Telegraph-ip allaaseraa, tamatumunnga pissutaanerarpaat Indiami qillerinerni iluanaarsimanera.
Indiami illoqarfiup Rajasthanip eqqaani uuliaqarfik imaarunnerarlugu, Royal Dutch Shell-p 1997-mi nalunaarutigaa, tamatumalu kingorna uuliaqarfik Cairn Energy-mut tunillugu. Uuliaqarfimmi imaarunnerakkami ullumikkut uulia ullormut qallorneqartarpoq nappartat 90.000-it. Tassalu maanna Cairn Energyp piginnittuata Sir Bill Gammell-ip piginneqataassutini tuniniassagunigit 1000-riaammik amerlillugit pisiaritissinnaanngorpai.
Kalaallit Nunaata eqqaani uuliamik ujarlernermut aningaasat qanoq amerlatigisut atorneqassanersut Ssimon Thomsonip oqaatigisinnaannginnerarpaa. Kisianni:
- Kalaallit Nunaanni uuliamik ujarlernermi ukiorpassuarni pimoorussisinnaavugut. Ukioq manna qaangiussimalerpat aningaasat 2,9 milliard koruunit atoreersimassavagut, taamaalilluta takutipparput ilumut maani Kalaallit Nunaanni uuliamik ujarlernitsinnik ilumoorussisugut, piffissaq qaninnerusoq isiginngilarput, sivisuumilli siunissamut ungasinnerusumut ingerlassalluta, Simon Thomson oqarpoq.
