Cairn mingutsitseqqinnissamut itigartitaavoq
Uuliasiortitseqatigiiffiup Cairn Energyp misileraalluni qillerinermini akuutissat arrortikkuminaatsut 160 tonsit Nunatta imartaani siorna aniatissimavai, Avatangiisillu pillugit Danmarkimi Misissuisoqarfiup, DMU-p, uuliasiortitseqatigiiffimmut sakkortuumik maanna piumasaqarpoq siunissamut qanoq iliuuseqaqqullugu.
Akuutissaq pineqartoq tassaavoq Ultrahib, akuutissat ajoquseerujussuarsinnaasut nunarsuaq tamakkerlugu nalunaarsorsimaffianni navianarnerpaatut allassimasunut ilaasoq.
Danmarkip Norgellu Nordsømi 2009-mi uuliamik qalluinerminni akuutissaq taamaattoq 30 tonsi sinnilaarlugu annertutigisoq aniatissimagaa, skotlandimiut Nunatta imartaani siorna 160 tonsimik aniatitsisimapput, naak ikinnerungaartunik qillerigaluarlutik, aviisimi Politikenimi ullumi saqqummersumi tamanna allaaserineqarpoq.
Pisoq siornali saqqummiunneqarpoq, Cairnili taamani isumaqarnerarpoq, akuutissanik allanik atuilernissaminnut pisussaaffeqaratik. Akuutissanik taamarsuaq aniatitsineq assorsuaq ernumanartoq Inatsisartut ataatsimiittarfiannit oqaatigineqarpoq.
Suliamulli tunngasumik pisortat paasissutissaataannik tamakkiisumik allakkatigut paasissutissinneqarnissamik qinnuteqaammi, Avatangiisinik Illersuiniaqatigiiffiup, Greenpeace-ip, pissarsiarisimasaani, aviisimit Politikenimit aamma pissarsiarineqarsimasumi, takuneqarsinnaavoq, Avatangiisit pillugit Danmarkimi Misissuisoqarfik, DMU, maanna akuliuttoq.
"Akuerineqarsinnaanngitsutut" "nunarsuarlu tamakkerlugu aalajangersakkanut akerliusumik iliuuseqarsimasutut" Avatangiisit pillugit Danmarkimi Misissuisoqarfiup, DMU-p, Cairn Energymut piumasaqaatigaa, akuutissaq Ultrahib akuutissamik allamik avatangiisinut mingutsitsinnginnerusumik taarsissagaa.
Politikenimi allassimasut naapertorlugit Aatsitassanut Ikummatissanullu Pisortaqarfiup Cairn Energy peqquaa, akuutissanik navianartunik aniatitsinertik annikillisinniaqqullugu. Tamannalu Cairn Energyp malinniarlugu neriorsuisoq, Cairnimit Linda Bain ilisimatitsivoq.
- Aatsitassanut Ikummatissanullu Pisortaqarfiup, aamma Avatangiisit pillugit Danmarkimi Misissuisoqarfiup, piumasaqaataanut tamanut naapertuuttumik pilersaarusiorniarpugut, Linda Bain aviisimut Politikenimut ullumi oqarpoq.Nunatsinni misileraalluni 2014-imi qillereqqinnissani Cairnip naatsorsuutigaa.
