Cairn gassimik nassaarpoq
Nassaarneq immap naqqani 3 kilometerisut ititigisumi pivoq, tamaani gasseqarfik 25 meterisut portussuseqartoq nassaarineqarmat.
Maanna ujaasineq Cairn Energyp Sri Lankami ukiut 30-t ingerlaneranni ujaasineraa siulleq, tamaanilu qillerinermi aatsaat siullerpaamik gassimik nassaartoqartoq, Cairn Energymit nalunaarutigineqarpoq, taamaattorli qallorneqarnissaa imminut akilersinnaanersoq paasiniarlugu qillerinerit ingerlatiinnarneqarallassasut aamma oqaatigineqarluni.
Nutaarsiassalli suunera apeqqutaatinnagu aktianik niueruteqartartunit tamanna nuannersumik tiguneqarpoq:
- Piffissami kingullermi ajutooqattaarnerit Cairnimit qaangerneqartut, nittartagaq Interactive Investor nalilersuisartunit Evolution Securities-imeersoq allappoq.
Nalilersuisartulli Cairn Energyp Kalaallit Nunaanni qillerinitik annikillisarniaraat aamma tusarrajussimavaat, tassami naluneqanngitsutut Kalaallit Nunaanni uuliamik ujaasilluni qillerineq akisoorujussuummat.