Cairn Aasiaat avataanni uuliamik nassaanngilaq

Cairn Energyp immami itisuumi, Aasiaat kitaani Eqquanik taagorneqartumi qilleriffini simereerpaa qimallugulu. Tamanna pivoq umiarsuaq qillerissut Corcovado tamaani uuliamik gassimilluunniit nassaanngitsooreersorlu. Skotlandimiut uuliasiortitseqatigiiffiat taama ilisimatitsivoq.
Allattoq Elisa Isaksen
septembarip 13-at 2011 06:25

Avasinnerusumi ikkannerusumili Napariamik taagorneqartumi qillerut Leiv Eiriksson qillerinermi itissuseq angorusutani anguniarlugu ilungersorpoq, nalunaarutigaalli suliaq ilimagisamit ilungersunarneruvoq, Cairn Energy nalunaarpoq.

Qillerineq Deltamik taagorneqartoq siorna Alphamik taallugu qillerinerup malitsigaa siornalu tamanna tassa uuliamik siumuiffiugaluarpoq. Ukiormannali kulbrinte-mut eqqaanarsinnaasunik annikitsuinnarnik siumuiffiusimasoq nalunaarutigaat.

Qilleriviup Corvadop itisuumut qillerivini matulluareerpagu aammalu Leiv Eirikssonip Napariamik qillerinini naammassippagu Cairn Nuup avataani misiliilluni qilleriniarpoq.

Cairn Energy aasaanerani qillerinerit sioqqullugit nalunaarpoq ukiormanna qillerinermut 3 milliarder koruunit atornissaat naatsorsuutigalugu. Maannali tassa qillerinerit naammassingajalerput annerusumik angusaqarfiunatik. Taamaattoq Cairn Energy-mi pisortaq Simon Thomsen nalunaarpoq nunatsinni uuliamik nassaarsinnaaneq suli upperigitsik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq