Café Inuunerissarfik ammalerpoq
Januarimi unnuk kulturisiorfimmi Nuummi innuttaasut peqqissutsimikkut inooriaatsimikkullu allannguerusunnerat Peqqissaavimmiit maluginiarneqarpoq.
Peqqissutsimut soqutiginninneq kiisalu piqqinnissaqarfimmiit suliniuteqarniarneq tunngavigalugit ”Inuunerissarfik” aallartilerpoq. Naatsorsuutigineqarporlu qaammatit tamaasa ammasarnissaa. Peqataarusuttut februarip 23.-ani nal. 16.30-18.00 akornanni Dronning Ingridip peqqissaavianut ornigutiinnarsinnaapput.
Peqataasut peqqissusaat misissortissinnaasut, ataasiakkaarlutillu siunnersortissinnaasut Jytte Lindskovip Inuunerissaasuniit oqaatigaa.
Timikkut tarnikkullu peqqinneq ataqatigiittutut isigai.
- Eqqumaffiginiartarpagut inuunermi pissutsit, apeqquserniartarlugillu. Aamma nerisaqarneq eqqumaffigisarparput, timilu aalatinnissaa pingaartillutigu. Timikkut tarnikkullu peqqisuuneq ataqatigiipput avissaartinneqarsinnaanngitsut, Jytte Lindskov KNR.gl-mut oqarpoq.