Sanaartornermik suliaqartut ataatsimeersuartut
Ukiuni aggersuni Nunarput aningaasaliingaatsiartariaqarpoq. Februaarimi ataatsimeersuartut missingiuppaat, inissianut aserfallassimaqaisunut 10-12 milliardit missaanniittut aningaasaliissutaasariaqartut.
Ataatsimeersuarnissaq Naalakkersuisut, DTU-p Qaasuitsumi Teknologiimik Inerisaavianit Arctic Business Networkimiillu suleqatigiissutigineqartoq, Issittumi sanaartornermi ileqqut II-mik taaguuteqarpoq.
Tassani inissianik aserfallassimasunik qanoq nutarterinissat iluarsartuussinissallu sanaartornermik suliaqartut oqallisigissavaat.
Suliassat tamakku kinguartinneqaqqissinnaanngitsut, DTU Artekimit issittumi ingeniørerinik ilinniartitsisoq Tove Lading oqarpoq.
- Pingaartunik arlalinnik aalajangiisoqassaaq - ilaatigut qanoq iluarsartuussisoqartigissanersoq nutaanilluunniit sanaartortoqassanersoq. Ingammik aningaasaliinissamut qanoq pisariaqartitsitiginerup paasinissaa minnerunngitsumillu aningaasat suminngaanniit pissarsiarinissaat paasissallugu pingaaruteqarpoq. Taava aamma ilinniarnermik aaqqissuussinerit naleqqussartariaqarput, maani sulisartut atorluarneqarsinnaaqqullugit, Tove Lading oqarpoq.
