"Bussit assakaasui ingerlappuut...ingerlappuut..."
Bussinimmi ingerlatsineq Maniitsumi kommunip marlunngormat aallarteqqippaa. Ulloq siulleq iluatsilluaqaaq, ilaasoqarluaqalunilu, Qeqqata Kommuniata nittartaagaani allapput. Innuttaasut amerlasuut, pingaartumillu meeqqat, bussit nutaat marluusut aappaat misilikkusussimaqaat.
Qeqqata Kommunia bussinik ingerlatsinermut tunuliaqutaavoq, ingerlatsinerli namminersortumut biiliutilimmut suliariumannittussarsiuussinikkut ingerlanneqartussanngortissimallugu. Qeqqata Kommuniata kommunimi najugaqarfiini anginerni pingasuni, Sisimiuni, Maniitsumi Kangerlussuarmilu suliariumannittussarsiuussinertigut bussinik ingerlatsineq namminersortunut taamaalilluni isumagisassanngortinneqarluni.
Maniitsumi bussinik ingerlatsineq bussinik nutaanik marlunnik siunertamut tamatumunnga pisinikkut iluatsinneqarpoq, issiaviit 24-nut inissaqarlutik nikorfasunullu qulit, bussillu marluullutik innarluutilinnut naleqqussagaallutik.
Siusinaartumik nalinginnaasumillu pensionisiallit bussinut akeqanngitsumik ilaasinnaapput, taamatuttaarlu atuartut atuarfimmiit ungasissumi najugallit, atuarnerup nalaani ilaanissamut allagartamik pisinnaasut, kommuni allappoq.
Angallatileruttornerup nalaani bussit marluutillugit ingerlaartinneqartassapput. Bussip aappaa ullaakkut arfineq-marluk qeqqata missaani aallartittassaaq, unnukkut qulinut tanneq qulit tungaanut ulluinnarni angalasassalluni. Ullaakkut ualikkullu bussit marluullutik ingerlasassapput. Maniitsormiulli sapaatikkut bussersinnaassanngillat.
