Buship ukiumoortumik oqalugiaataa isoraat

- Buship mingutsitsinnginnissamut siunniussai erseqqinnerusinnaapput, biilinut orsussamik atuineq 20 procentinik annikillisartariaqartoq oqalukkaluarpoq allanilli iliuuseqartoqarnissaanik oqaaseqannginnera pakatsinarpoq, Connie Hedegaard oqarpoq.

Amerikamiut præsidentiata Irakimut tunngatillugu siunniussai tappiitsuupput ulorianarluinnarlutillu.

George Buship oqalugiarneranut Danmarkimi Socialdemokratit nunanut allanut tunngasunut oqaaseqartartuat Mogen Lykketoft taama isorinnippoq.

-Amerikamiut gassimik ipinartortalimmik C02-mik taama silaannarmut mingutsitsitigisut, taamaallaat killilimmik siunnersuuteqarpoq, Lykketoft uparuaavoq.

USA-p uuliamik atuivallaarunnaarnissaanik Buship oqalunnera Lykketiftip uppererpianngilaa.

- Imaasinnaavoq silaannaap allanngoriartorneranut paasinnikkiartulersunut iluareqqusaaginnartoq, tassami Koytomi isumaqatigiissummut Bush ukiuni arfinilinngortuni suli atsiorusunngilaq, Mogens Lykketoft erseqqissaavoq.

Bush Japanimiunit aamma isorineqarpoq.

Japanip illersornissamut ministeria Fumio Kyuma oqarpoq, Amerikkamiut Irakimut isaasimanerat kukkunerusimasoq. Japanimiut USA-mut aalajaannerpaallutik tapersersuisartuupput, Irakimullumi aamma sakkutuuminnik aallartitsinikuullutik, Irakimulli sakkutuuliussatik ukioq manna angerlarartinniarpaat.