Buship naaggaarsinnaatitaanini ullumi atorpaa

Amerikami præsidentip Buship inatsisissatut siunnersuummut naaggaarsinnaatitaanini ullumi atorpaa, tassa inatsisissatut siunnersuut naapertorlugu Bush pisussaaffilerniarneqaraluarami ukiup matuma ingerlanerani sakkutuunik Irakimit angerlarartitsilluni aallartissasoq.

- Amerikami Inatsisartuni amerlanerussuteqartut inatsit akuersissutigisaat tassaavoq sakkutuut qullersaasa naliliinerisa naalakkersuinikkut isummanik taarserneqarnerat, taamaattumik naaggaarsinnaatitaanera atorpara, Bush oqarpoq.

Buship naaggaarsinnaatitaanerminik atuiffigisaa tassaavoq Demokratit inatsisissatut siunnersuutaat. Siunnersuut naapertorlugu Bush pisussaaffilerneqartussaagaluarpoq amerikamiut sakkutuuinik Irakimiittunik angerlarartitsilluni oktobarip aallaqqaataani aallartissasoq, ukiullu affaa qaangiuppat sakkutuut tamarmik angerlarartinneqareersimassasut.

Angerlarartitsinissaq amerikamiunit isumaqatigilluarneqaraluarpoq, tassami qinersisartunik isumasiuinermi 59 procentit angerlarartitsinissaq isumaqatigaat. Kisianni ulluleereerluni angerlarartitsiniarneq Buship oqaatigaa tassaasoq ajorsarnissamut ulluleereerluni tunuaannarneq.

Irakimi sorsunnermut atatillugu aningaasartuutissatut missingersuutitut siunnersuut Amerikami Inatsisartut sorsunnerup iliuuseqarfiginissaanut periarfissatuarigaluarpaat. Tamannali Buship tassa naaggaarsinnaatitaanini atorlugu qatangiinnartippaa. Sorsunnermut atugassanik Bush 670 milliardi koruuninik immikkut aningaasaliissutissanik qinnuteqareernikuuvoq!