Bush senat-imi ajorsarpoq
USA-p præsidentia Bush, Irakimut politikini pillugu ullumi Amerikamiut inatsisartuini ikinnerussuteqaqqippoq.
Tassami amerlanerussuteqartut aalajangiuppaat, Buship sakkutuunik angerlarartitsinini qaammatit sisamat ingerlaneranni aallartissagaa angerlarartitsininilu ukiup tulliuttup naannginnerani naammasseriissagaa.
Tamanna sioqqutitsiarlugu Buship inatsisissatut siunnersuutigineqartumut naaggaarsinnaatitaanini sioorasaarutigaa.
Bushimut naalakkersuinikkut ajorsarneruvoq. Buship sakkutuunik angerlarartitsinissamut inatsisissatut siunnersuut, inatsisartut immikkoortuini marlunni senatimi Repræsentanternes Husimilu pinngitsoortissinnaasimanngilaa.
Tamanna Bushimut ilungersunartuuvoq, taamaattumik sapaatip akunnerata ataatsip ingerlanerinnaani pingasoriarluni, inatsisissatut siunnersuummut naaggaarsinnaatitaanini atorniarlugu sioorasaarutigaa.
Buship sioorasaarutini piviusunngortissagaluarpagu taamalu naaggaarsinnaatitaanini atussagaluarpagu inatsisartut 2/3-iisa præsidentip aalajangiinera atorunnaarsissinnaavaat. Kisianni Demokratit taama amerlatigisunik tapersersortissarsisinnaanissaat ilimagineqanngilaq.
Taamaattumik USA-mi inatsisartut aamma Præsident Buship aningaasartuutissatut missingersuutit apriilip 15-at nallertinnagu isumaqatigiissutigisinnaanngippatigik, taava sorsunnerup ingerlateqqinnissaanut aningaasartuutissanut missingersuutaarutissaaq. Taamatullu pisoqarpat USA-mi inatsisartut præsidentillu naalakkersuinikkut akerlereerujussuarnerat pilissaaq. Tamannalu ukiut qulit matuma siornagut misigineqarami aatsaat misigeqqinneqassaaq. Tassa massakkut USA-mi naalakkersuinikkut pissanganartorsiortoqarpoq.
