Bush Jordanimi tikilluaqquneqarpoq

USA-p præsidentia Bush akerliussutsimik takutitsisunit tikilluaqquneqarpoq, ullumi Jordanimi illoqarfiit pingaarnersaanut Ammanimut tikimmat. Illoqarfimmi tassani ilaatigut Irakip præsidentia al-Maliki ataatsimeeqatigisussaavaa.

Ataatsimiinnissaq sioqqullugu Irakimi naalakkersuisuni, partiinit tamaneersunik ilaasortaqartuni, ilaasortat arfinillit shiamuslimiusut nammineerlutik tunuarput, al-Malikip Bushimik ataatsimeeqateqarnissaa akerliuffigalugu.

Ataatsimiinnissaq akerliuffigineqaqisoq Buship qanormita pissarsiffigissangavaa:

Buship neriuutigaa Irakimi illoqarfiit pingaarnersaani Bagdadimi eqqissiviilliornerit Malikip unitsissinnaassagai.

Amerikamiut Pentagonimit nalunaarutigeqqammerpaat, Amerikamiut sakkutuui Irakip kitaaniittut ilaat Bagdadimukartinneqassasut tamaani eqqissiviilliorneq millisinneqarsinnaaniassammat.

Buship aamma neriuutigaa Irakip præsidentia Maliki eqqaamiuminiit, soorlu Jordanimit Saudi-Arabiamillu ikiorserneqarsinnaassasoq, ilaatigut Irakimi sunni-muslimit paasitinniarlugit piumasaqarpallaarunnaartariaqartut suleqatiginnikkusussuseqarnerusariaqartullu.

- Taavami oqartoqarsinnaanngila Buship Jordaniliarnermigut Irakimi pissutsit ajornerulersiinnarai?

Tassa sunni-muslimit siuttuata ministerini arfinillit tunuaqquai Malikip Bush ataatsimeeqatiginiarmagu.

Oqartoqarsinnaavoq Malikip Bushimik ataatsimeeqateqarnissani piinnarlugu naalakkersuisuni annaassagunigit taava sanngiippallaarsimassasoq.

Malikip sanngiippallaarnera Amerikamiunit uparuarniarneqartalerpoq, isumaqartoqarluni eqqissiviilliornerit taassuma unitsissinnaanngikkai.