Burmami ippassaq inuit 100.000-it akerliussutsimik takutitsipput

Rangoonimi generalit mattuttullu aporaatilernissaat ilimanarsiartuinnarpoq.

Akerliussutsimik takutitsisut ippassaq aatsaat taama amerlatigaat inuit 100.000-it aqqusinerni akerliussutsimik takutitsimmata.

Mattuttut 10.000-it Rangoonimi illoqarfiup qeqqatigut ingerlaaqatigeeqqipput.

Akerliussutsimik takutitsinerit pinerisa nalaani sakkutuut kisermaassillutik naalakkersuisuusut højtalerilerlutik sioorasaaripput illoqarfiup qeqqaniit peeqqusillutik.

Reuters Bureau-mit oqaatigineqarpoq, lastbiilit arfineq pingasut politiinik anaatalisartunik aallaasisartunillu useqarlutik kiisalu lastbiilit aqqanillit sakkutuunik usisut illoqarfiup qeqqanut akerliussutsimik takutitsisoqareersimatsiartorlu tikiussimasut.

Inuit takunnissimasut oqaatigaat, politiit illoqarfimmi sumiiffinnut assigiinngitsunut inissiortorneqarsimasut, napparsimmaviillu inunnik amerlanerusunik tigooraasinnaasunngorlugit aaqqissuunneqarsimasut, parnaarussiviillu inittorsarneqarsimapput tigusanik nutaanik inissaqalerniassammata.

Nunanut allanut sinniisuutitat aamma oqaatigaat sakkutuut 40.000-it missaaniittut piareersimatinneqarnialersut.

Maannakkut annilaanngatigineqalerpoq 1988-imisut akerliussutsimik takutitsisut angutaasernikkut unitsinniarneqalissanersut taamanikkut inuit 3.000-init amerlanerusut toqutaapput.

Mattuttut neriorsuisimapput kisermaassillutik sakkutuut naalakkersuisuusut mattuttunut utoqqatsertariaqartut qaammatip ataatsip matuma siorna mattuttut akerliussutsimik takutitsineranni sakkutuut nakuusersimammata.

Nutaarsiassaqartitsiviit arlallit oqaatigaat unnuk mannamiit sakkutuut kisermaassillutik naalakkersuisuusut Burmap illoqarfiini anginerni marlunni Rangoonimi Mandalyimilu aneqqusiunnaarsimasut, soorlu inuit tallimanit amerlanerusut katersuuteqqusaajunnarsimapput. Unnukkut aneqqusiunnaarneq ulluni 60-ini atuutsissasoq oqaatigineqarpoq.

DR-p ilanngutassiaa.