Burmami Illuatungiliuttut malersorneqarput

Burmami quiasaarisartoq mattuttorlu budhasiortoq Burmami ullumi sivisuumik paarnaarussassanngortinneqarput. Quiasaarisartup ilaatigut Rambo-mik filmiliaq angerlarsimaffimmini pigimmagu, ukiuni 45-ni paarnaarussassanngortinneqarpoq. Burmami kisermaassillutik naalakkersuisut illuatungiliuttunik sapaatip akunnerini makkunani peqqarniisaarlutik malersuipput, paarnaarussivinnilu tusaamanerlunneqaqisuni pineqaatissinneqartut inuummersornissaat tusagassiortup Burmamiup ilimaginngilaa.

novembarip 21-at 2008 14:22

Burmami quiasaarisartup tusaamasap, Zarganarip, ilaatigut filmi ”Rambo 4” angerlarsimaffimmini pigigamiuk ukiuni 45-ni paarnaarussassanngortinneqarpoq. Filmimi tassani Sylvester Stallonep Burmami naalakkersuisut sakkutuui toqorarmagit filmi Burmami pigissallugu inerteqqutaavoq. Kisermaassillutik naalakkersuisut illuatungiliuttunik 100-t sinnerlugit amerlatigisunik tigusarinneriarlutik, piffissami kingullermi ukiorpassuarni paarnaarussassannguillutik pineqaatissiisarput. Tusagassiortoq, Ang Sao, Burmamiit qimaalluni Thailandimi najugaqaraluarluni, sumiiffinni assigiinngitsuni atassuteqarfigissaarpoq, namminerlu Burmami sivikitsumik paarnaarussaaqqanikkuulluni. Ang Sao oqaluttuarpoq paarnaarussat timikkut tarnikkullu peqqarniitsumik naalliutsitaasartut, kiisalu naalakkersuisut aamma orpippassuarni paarnaarussiveeqqat atortaleraat, tamaanilu nappaat malaria, nappaatillu allat tuniluuttut naliginnaasut. Aviisimi Burmami saqqummersinneqartartumi aaqqissuisoq, Ang Sao taamatut oqaluttuarpoq.

Burmami Illuatungiliuttut malersorneqarput

Aamma atuaruk